ព្រឹត្តិការណ៍បុណ្យភូមិបានចាប់កំណើតពីសារណាបញ្ចប់ឆ្នាំរបស់និស្សិត នៃមហាវិទ្យាល័យប្រព័ន្ធផ្សព្វផ្សាយ និងទូរគមនាគមន៍ គឺកញ្ញា រិទ្ធី លំអរពេជ្រ។ កាលណោះ ក្នុងឆ្នាំ២០០៤ លំអរពេជ្រ ដែលត្រូវជ្រើសរើសយកការផលិតឯកសាវីដេអូក្រោមប្រធានបទ ល្ខោនស្រមោលស្បែកធំ ត្រូវការការសំដែងជាក់ស្តែងមួយ ហើយក្នុងទម្រង់បែបបុរាណទៀត។ ពោលគឺ វាជាការសំដែងក្រោមពន្លឺភ្លើងដែលគេដុត តែមិនមែនពន្លឺអគ្គិសនីឡើយ។ ហើយជាការពិត វាត្រូវតែជាការសំដែងល្ខោនមួយជាសាធារណៈ ដែលមានអ្នកទស្សនា។ យុវជននិស្សិត លំអរពេជ្រ ដោយមានការចូលរួមពីប្អូនស្រី និងមិត្តភក្តិ២រូបទៀត បានដាក់ចិត្តដាក់កាយរៀបចំកម្មវិធីសំដែងល្ខោនស្រមោលស្បែកធំតែម្តង ដើម្បីបានរូបភាពក្នុងការថតវីដេអូឯកសារ។
